Nok tra tulih ko loghat kelatae skali ni...
Takdi lepah smaye zohor jemaah di opih, ustad di opih (kito ado ustad di opih ni...pegawai tadbir sebenanyo tp ado kelulusan dr Universiti Azhar pahtu dr skoloh tahfiz hok ssohor di Pulai Chondong) bui tazkiroh sikit nok nok gak kito ni di fasa akhir bulae Ramadhae doh ni hok mano kito mitok nga Allah jjauhlah api nerako tu dr kito ssemo. Ustad kato loni agok-agoknyo lah kito ni boleh doh nilai sikap kito, beruboh ko dok akhir-akhir poso kito...holah mugo nok masuk syurgo blako kalu boleh gak...jange duk seko buruk ko oghe, ke'cek nnawok etc..bendo-bendo negatif pendek gak....
Pahtu ustad ssapa sor riwayat Rasululloh SAW kito.... maso di masjid (masjid mano ustad tok sebut), Rasulluloh kato ko sahabat-sahabat hok ado ssitu... nok kenal ko sapo ahli syurgo hok akae masuk kut pitu masjid tu? Mestilah sahabat-sahabat nok tau...kito pun nok tau jugok dok? Masukla Saad Abi Waqqas kut pitu tu.... sapa tigo hari turut-turut Rasululloh tanyo gitu ko sahabat-sahabat, pah turut-turut tigo ari tu jugok hok masuk di pitu tu Saad Abi Waqqas. Adolah soghe sahabat tu nok tau amalae gapo Saad Abi Waqqas ni buat sapa boleh jadi ahli syurgo. Dio pun gi lah ko rumoh Saad ni...dio oyak ko Saad dio bbaloh nga ayoh dio pah kalu boleh nok tupae tido/duduk di rumoh Saad. Saad builah izin dio tupae duduk/tido ssitu. Sahabat ni pun perhatilah gapo Saad buat maso dio duk dhumoh tu tapi tak dok lah dio napok Saad ni duk tadarrus quran ko, smaye tahajjud ko. Sapa tigo hari dio duk di rumah Saad....last-last dio pun oyak ko Saad... dio buat lolok (bohong) ko Saad yae dio bbaloh nga ayoh sebenanyo dio nok tahu amalae gapo Saad buat sapa boleh jadi ahli syurgo supo kato Rasululloh SAW. Saad Abi Waqqas pun oyaklah sebenanyo dio ni tok ghajin seko buruk ko oghe lain....seko baik sokmo.
Molek benalah kito ssemo ikut cagho Saad Abi Waqqas ni...sokmo-sokmo seko baik ko oghe lain... banyok pengajaran dari riwayat ni.
Nabi SAW bersabda, mafhumnya:
"Kalian tidak akan masuk syurga sehingga kalian beriman
dan kalian tidak akan beriman sehingga kalian saling mencintai
Mahukah kalian aku tunjukkan sebuah amalan yang apabila kalian melakukannya, nescaya kalian akan saling mencintai?
Sebarkanlah salam di antara kalian "
(Hadith Sahih, Riwayat Imam Muslim)
SALAM AIDILFITRI
Maaf Zahir & Batin
